الاستاذ هاشم صديق

وكتين تجي

وكتين تجي

ويميل بابنا الكبير تحت الشمس يرقص

النيم يفوح يصبح ورد

جيرو ويهش والبيت ينور

تمتم خطاك شدة التعب

وسوي العجب

السقف خلي الجريدفوق

خدر وطال سوي العجب

وخلي النجم لينا انبرش

وحَرَن القمر

اقسم يمين ما يغيب ويِمِ

وكتيت تجى

القاكى دَارِع فوقى شال

مشغول بجدلت الحرير

والعِمّه كيف

والمكوه سيف

وقليبى ليك عند السلام

القاهو بس داير يطير

واكرم مَجِيك

أسقِيك قصايدى الفيك عصير

واجلِد دلاليك الفرح

من الصباح لاَ عِن نسيمات العصير

وكتين تجى

شُبَاكنا يفرد ضلفتين

وحبوبه لى خالق الجمال

تتوضا تركع ركعتين

ودنيتنا تصبح دنيتين

وصغارنا ليك طابور شَرَف

تعظيم سلام ويمين شمال..وشمال يمين

والعيد يصل قبُل الميعاد

والخير يزيد......ويملا الايدين.